Hotelka Jasiira ee magaalada Muqdisho ayaa waxaa lagu soo gebagebeeyey maanta shirweynihii 4aad ee xisbiga Nabada iyo Dimoqraadiyada oo ka mid ah asxaabta siyaasadeed ee ka jirta Somalia.

Waxaa munaasabada gebagebada ka qeyb galay, xubnaha golayaasha iyo hogaanka xisbiga SPDU, xildhibaano ka tirsan Baarlamanka Somalia, madaxda axsaab kale iyo bahda saxaafada gudaha iyo dibeda.

Waxaa xafladaas hadalo furitaan ah ka jeediyey xoghayaha guud ee Xisbiga Nabada iyo Dimoqraadiyada C/salaan Maxamed Siyaad oo ka hadlay taariikhda iyo marxaladaha uu soo maray xisbiga, isagoo xusay in xisbiga Nabada iyo Dimoqraadiyada lagu aasaasay magaalada Bermingham ee dalka Ingiriisa sanadkii 2010-kii, wuxuuna tilmaamay in ka dib xisbiga loo soo raray Muqdisho sanadkii 2011-kii.

“Qaab dhismeedka xisbiga waa gole heer Qaran ah, waxaana uu ka kooban yahay, hogaan leh gole dhexe iyo guddi fulin, wuxuuna leeyahay laamo heer gobol iyo heer degmo ah, SPDU maaha Xisbi qabiil iyo xisbi goboleed waa xisbi Soomaali oo dhan ay ku jirto, kuna shaqeeya mabaadi’ u degsan oo ku dhisan nabad, cadaalad iyo horumar, ma hubeysna hase ahaatee waa mucaarad u taagan wax toosin” ayuu intaa ku daray xoghayaha guud ee SPDU.

Waxaa sidoo kale ka mid ahaa xubnaha ka hadlay xildhibaan Maxamed Cumar Dalxa oo ka mid ah Baarlamanka Somalia kaasoo sheegay inuu ku faraxsan yahay ka soo qeyb galka xafladan, wuxuuna xusay in xisbiga SPDU uu ka mid yahay xisbiyada ugu horeeyey ee dalka ka bilaabay dhaqdhaqaaq siyaasadeed iyo isbaheysiyo aan hubeysaneyn oo ujeedadiisu tahay in wax la toosiyo, talada dalkana laga wada tashado.

“Madaxweynaha hadda xilka haya waxaa uu ka soo jeeda Isbaheysiga uu ka tirsan yahay xisbiga SPDU, waxaana ka dalbaneynaa inuu ka soo baxo balanqaadkiisii ahaa inuu axsaabta siyaasadeed ee dalka siinayo muhiimad gaar ah, maadaama la soo wada halgamay, haddii laga waayo inuu qabto wixii uu shalay balanqaaday in la mucaarado oo la tusiyo qaladaadja ha ogolaado” ayuu intaa ku daray xildhibaan Prof. Dalxa.

“Haddii lagu yiraahdo shaatigaaga toosiso ama meeshaasaa kaa qaldan macnaheedu maaha in cadow lagugu yahay ee adigaa lagu toosinayaa si aad isu saxdo, marka mucaarad aan hubeysneyn haduusan jirin, dowladnimo fiican lama gaarayo, sababtoo ah mucaaradka meesha ay wax ka qaloocan yihiin ayuu wax farta ku fiiqaa” sidaa waxaa tiri xildhibaanad Khadiijo Maxamed Diiriye oo iyana halkaas ka hadashay.

Ubax Tahliil oo gudoomiye u ah garab ka mid ah labada garab ee uu kala jabay ururka haweenka Qaranka Soomaaliyed oo iyana halkaas ka hadashay ayaa sheegtay in iney wanaagsan yihiin xisbiyada siyaasadeed ee dalka ka abuurmaya ayna aad u soo dhoweynayaan in xukunka lagu raadiyo iyadoo codka dadweynaha lagu raadinayo si nabad ah.

“Xisbiyada dalka ka abuurmaya haweenku waa ku yar yihiin, waxaan kula talinayaa iney siiyaan boqokkiiba 50 xubnaha xisbiyada maadaama haweenku ay kaalin hore kaga jiraan nabadeynta iyo xaslinta dalka” ayey intaa ku dartay Marwo Ubax Tahliil.

Dhinaca kale, C/llaahi Shiikh Xasan ayaa hambalyo ku aadan sanadka cusub ee miilaadiga 2013-ka u diray ciidamada dowlada Somalia iyo kuwa AMISOM ee dalka u jooga iney difaacaan qaranimada umadda Soomaaliyeed, wuxuuna ka codsaday dowlada Somalia iney ciidamada AMISOM ay ku darto diiwaanka taariikhda Soomaaliya.

“Waxyaabaha dhaliisha ah ee weli miisaaniyada nooga muuqda waxaa ka mid ah sida loo yareeyey lacagaha loo qaoondeeyey adeegyada bulshada sida waxbaarshada, caafimaadka, biyaha iyo nadaafada, waxaana haboonaan laheyd in adeegyadaas dhaqaaler badan lagu bixiyo maadaama aad loogu baahan yahay” ayuu intaa ku daray C/llaahi Shiikh Xasan.

gabagabadii aya awaxa agoobta shahaado sharaf lagu gudoonsiiyay tv-ga Somali channel iyo qaar kale oo kamid ah warabaahinta ka howl-gasha magaalada muqdisho iyadoona   xubno ka socday xildhibaanada baarlamnka uruda bulshada rayidka iyo haweenka qaran uu shahaadii loogu tal galay Somali shannel uu ka gudoomiyahay agaasimaha Somali channel ee xarunta magaalada muqdisho maxamed siciid axmed sh aadan

FG: Shabakada Wararka ee Somalisan Mas'uul kama ahan Cidii ku xadgudubto Shaqsi Raalina kama noqonayso Somalisan.com.