Axmed Maxamed Maxamuud Siilaanyo oo sheegay in dowlada somaliya aysan matali karin Somaliland

1/31/2013 10:22:00

Ictiraafka Mareykanku siiyey dowladda cusub ee Soomaaliya, arrintaasi ma aha wax Somaliland khuseeya


Madaxweyn aha maamulka Somaliland Axmed Maxamed Maxamuud Siilaanyo ayaa shalay labada gole ee Baarlamaan iyo Guurtida ee maamulkiisa ka jeediyay khudbad sanadeedka 2013-ka, kaas oo uu kaga waramay wixii u qabsoomay mudadaasi iyo mustaqbalka waxa u qorshaysan, isagoo sidoo kale ka hadlay aqoonsiga Mareykanku siiyey Soomaaliya, wadahadaladii Somaliland iyo Soomaaliya u socday iyo qodobo kale oo ay ka mid yihiin hadalkii dhawaan ka soo yeeray dowladda Ingiriiska oo ku baaqday in dadka u dhashay dalkeedu ay deegaanada Somaliland isaga soo baxaan.

“Dowladda cusub ee Soomaaliya waxaan jecelahay inay inoo dhaxeeyso cilaaqaad fiican, waxaanu cid walba u sheegaynaa inaysan dowladda Soomaaliya ka jirtaa aysan Somaliland dowlad u aheyn , mana xukunto, waxaynu dowladnimadeenii dib ula soo noqonay sanadkii 1991-kii, maanta waxaynu ku howlanahay horumarinta dalkeena iyo aqoonsi aynu ka helo dunida, dowladda Soomaaliya iyo dadkeeda waxaynu ka rajeynaynaa inay garwaaqsadaan inaynu u tashanay masiirkii ummadeena xaqna u leenahay, mana jirto cid jujuubi kartaa” ayuu yiri Siilaanyo.
“Ictiraafka Mareykanku siiyey dowladda cusub ee Soomaaliya, arrintaasi ma aha wax Somaliland khuseeya, mana aha wax cusub ee weligeedba dowladda Mareykan way ictiraafsaneyd Soomaaliya, balse waxay hadda agolaadeen maamulkan cusub, anaguna kama xumin xasadna kuma nihin wixii dadka Soomaalida u kordhaya iyo inay nabadgelyo iyo horumar gaaran oo wax dhistaan” ayuu yidhi Madaxweynaha Somaliland mar uu ka hadlayey aqoonsiga Mareykanku siiyey Soomaaliya, waxaanu sheegay inaysan aqoonsigaasi waxba ka bedelin xiriirkii Somaliland iyo Mareykanka ka dhexeeyey.
“Dowladda Ingiriiska waxaa inoo dhaxeeyay xiriir soo jireen ah oo taariikhi ah, waxa inaga dhexeeyay iskaashi heer fiican marayey, waxaanse ka xumahay dhawaaqa arrimaha dibadda Ingiriiska ka soo yeeray ee lagu sheegay in Somaliland ay ka jirto xaalad nabadgelyo xumo ahi, dhawaaqaasi muu aheyn mid u qalma oo ku haboon xiriirka labada wadan, waxaanan u arkaa mid lagu degdegay,

qarankan waxaan usoo maray halgan dheer, waxaan usoo sabray wakhti dheer, waxaan u dhaartay dantiisa, waxaanan u hurayaa wax kasta oo suurtagal ah, waxaan idin waydiisanayaa taageeradiina. Waxaanad ku kalsoonaataan waayo aragnimadayda iyo aqoontayda siyasadeed in aanay maanta xaajo iseegayn, in aan qofna iga jeclayn in dalkan iyo dadkiisu wax noqdaan” ayuu yiri markale.

Warar kale oo xiiso leh halkaan ka aqriso.


FG: Shabakada Wararka ee Somalisan Mas'uul kama ahan Cidii ku xadgudubto Shaqsi Raalina kama noqonayso Somalisan.com.

Fikirkaaga hoos kadhiibo:





Nagala Soo Xiriir: +252695576666/+252615576666//+252699907666 somalisan@hotmail.com / somalisan@gmail.com