Maamulka Bidhaan Huteel oo Beeniyey Warar ay Warbaahinta Qaar Ka Faafiyeenş

2/22/2013 4:32:00 P

Sidoo kale, waxa isna Shirkaa Jaraa’id ka hadlay Mulkiilaha Bidhaan Huteel CabdiShakuur Bidhaan oo sheegay inuu been-abuur lagu deg-degay uu yahay warka lagu sheegay in Bidhaan Huteel dad looga shakisan yahay argagixiso ay galeen oo ay Ciidammada Boolisku soo qabqabteen xalay


Maamulka Hoteelka Hurdada ee Bidhaan ee magaalada
Hargeysa ayaa beeniyey Warar ay qoreen qaar ka mid ah warbaahinta Somaliland, kuwaasoo sheegay in Ciidamadda Boolisku xalay dad looga shakisan yahay argagixiso oo Boolisku baadi-goobayeen inay Bidhaan Huteel galeen, isla markaana qaarkood halkaa lagu soo qabqabtay.

Hase-yeeshee, Maamulka iyo Mulkiilayaasha Bidhaan Huteel oo maanta Shir Jaraa’id ku qabtay Huteelkaas oo ku yaalla Xaafadda Dumbuluq oo ka tirsan Degmada Maxamuud-Haybe ee magaalada Hargeysa, ayaa beeniyey warkaas oo ay ku tilmaameen wax laga xumaado oo Sumcadda ganacsigooda  wax loogu dhimayo, iyaga oo sheegay inaanay jirin dad ay Ciidammada Aammaanka Somaliland ka soo qabteen huteelkooda oo argagixiso lala xidhiidhinayo iyo kuwo kale toona. Waxaanay ku doodeen oo ay intaa ku dareen inaanay jirin Ciidan galay ama baadhitaan ku sameeyey Bidhaan
Huteel.

Maamulaha Bidhaan Huteel Xuseen Maxamed Koosaar oo shirkaa Jaraa’id ka hadlay, ayaa si adag uga hadley wararkaas oo uu ku tilmaamay kuwo aan sal iyo raad toona lahayn oo xaqiiqada ka fog. “Warbaaahinta waxa looga baahan yahay inay marka hore iska hubiyaan wararka ay baahinayaan, waayo? Xalay dhacdadii halkan ka dhacday iyagoon waxba naga soo weydiin ayey iska baahiyeen Bidhaan Hotel ayaa laga qabtay niman looga shakisan yahay argagixo, taasina waa been-abuur, mana jiraan Boolis Huteelkan Bidhaan soo galay ama baadhitaan ku sameeyey iyo cid Bidhaan Huteel laga qabtay toona.” Sidaa ayuu yidhi Maamulaha
Bidhaan Huteel Xuseen Maxamed.

Sidoo kale Maamulaha Bidhaan Huteel Xuseen Maxamed Koosaar, ayaa isagoo ka hadlaya sidii ay wax u dhaceen xalay waxa uu yidhi; “Xalay abbaaro 11:00-kii habeennimo ayaa waxa aannu ku war-helnay Ciidammada Booliska ee SPU-da iyo RRU-da loo yaqaan oo guud ahaan Xaafadda ku wareegsan, kuwaasoo ujeeddada iyo bartilmaameedka uu ku ay ku socdeen guryahan Huteelka ka dambeeya, halkaasoo ay dad dhawra ka qabteen guryaha ka danbeeya hotelka waxa loo qabtayna aannaan ka warhaynin.

Laakiin, Bidhaan Huteel Ciidan soo galay ama baadhitaan ku sameeyey oo cid ku qabtay ma jiro, Ciidankuna jidadka iyo Meheradaha Xaafaddan Huteelku ku yaallo way xidheen intii hawlgalka ay ku jireen.”Xuseen Maxamed Koosaar, waxa uu sheegay in dadka Huteelka ku soo dega Soomaali iyo Ajaannib-ba ay waraysiyo la sameeyaan intaanay Huteelka ka kiraynin, isla markaana ay ogaadaan qof kasta oo Huteelka deggan halka uu ku socdo, halka uu ka yimi iyo Sharciga uu dalka ku soo galay.
 
Isla markaana, ay wada-shaqayn toos ah leeyihiin Laanta
Socdaalka Somaliland oo ay arrimahaa kala shaqaysa Hudheellada Hurdada ee lacagta lagu seexdo.

Sidoo kale, waxa isna Shirkaa Jaraa’id ka hadlay Mulkiilaha Bidhaan
Huteel CabdiShakuur Bidhaan oo sheegay inuu been-abuur lagu deg-degay uu yahay warka lagu sheegay in Bidhaan Huteel dad looga shakisan yahay argagixiso ay galeen oo ay Ciidammada Boolisku soo qabqabteen xalay, waxaanu yidhi; “Warbaahinta waxaan leeyahay maaha in sabab la’aan aad u dacaayadaysaan Ganacsi ama Meherad Muwaaddin reer Somaliland ah oo isagu cid walba ka nabadgelyo jeceli leeyahay mana habboona in ganacsiga of war aan jirin laga sheego. Markaa, warbaahintii warkaas qortay ee Hubaal, Halbeegnews iyo kuwo kale, waxaannu uga fadhinaa inay caddeeyaan waxa ay baahiyeen ee beenta ah.”

“Ciidammada Booliska ee RRU-da iyo SPU-du markay Xaafaddan Dumbuluq yimaaddeen aniga oo Huteelka Hortaagan ayey Gaadhi hortayda oo waddada ah kaga degeen, waxay igu yidhaahdeen; ‘gal gudaha, albaabkana xidh,daaqadahana lama furi karo’ haye baan idhi, gudaha Huteelkaan soo galay, albaabkiina waan xidhay, Xaafadaha dambe ayey baadhitaan ku bilaabeen guryo ay si gaar ah ugu socdeen, dadna ka qabqabteen, laakiin Ciidan Bidhaan Huteel soo galay iyo kuwo baadhay iyo kuwo cid ka qabtay midna ma jirto, cidda warkaa faafisayna caddeyntiisaannu ka
doonaynaa.” Sidaa ayuu yidhi Cabdishakuur Bidhaan.


Warar kale oo xiiso leh halkaan ka aqriso.


FG: Shabakada Wararka ee Somalisan Mas'uul kama ahan Cidii ku xadgudubto Shaqsi Raalina kama noqonayso Somalisan.com.

Fikirkaaga hoos kadhiibo:





Nagala Soo Xiriir: +252695576666/+252615576666//+252699907666 somalisan@hotmail.com / somalisan@gmail.com