Xerada dadka waalan ,caruurta darbi jiifka ah iyo agoonta oo maanta la gudoonsiiyey ,raashin ah bariis ,saliid ,caano ,iyo dhar .

Dad Somali ah oo ku nool dalalka Mareykanka, Norway iyo Canada ayaa waxay kaalmo lacageed u soo direen dad waalan iyo agoon ku dhibaateysan Magaalada Muqdisho, si ay uga farxiyaan maalmaha ciidda ee soo socda.

Lacagahan deeqda ah oo lagu iibiyay raashin iyo dhar, qaarkood loo dhiibay si caddaan ah ayaa waxay samofalayaashan u soo wakiisheen Wariye Muuse Max'ud Jiisoow, isagoo gudoonsiiyay guddoomiyaha hay'adda Ahlu-kheyr ee xanaaneynta iyo daryeelidda agoonta iyo dadka waalan.

Dadka deeqahan soo dhiibay ayaa waxay kala ahaayeen: Xaawo Xaaji Xuseen oo ku nool dalka Mareykanka gaar ahaan Gobolka Minnesota waxayna soo dhiibtay US$210, Aamino Cumar Carab oo ku nool Magaalada Oslo ee dalka Norway oo soo dhiibtay US$200 iyo wiil aan magaciisa sheegin oo ku nool Magaalada Toronto Ontario ee dalka Canada oo soo dhiibay US$150.

Wakiilka deeqdan lacageed ayaa Muuse Jiisow oo ka hadlay deeqda ayaa sheegay in dadkan walaalaha ee soo dhiibay ay yihiin kuwo ka damqaday dhibaatada haysata agoonta iyo dadka waalwaalan ee Somalia ku nool.

"Deeqdan waxay qayb ka tahay deeqo horay loo guddoonsiiyay xarunta, waxaana US$200 oo ka mid ah lacagtan loogu deeqay caruur agoon ah oo xeradaas lagu xanaaneeyo isuguna jira wiilal iyo gabdho" ayuu yiri Muuse Jiisow.

Guddoomiyaha xerada Ahlu-kheyr Sheekh C/raxmaan Macow Xaaji Maxamed oo isaguna saxaafadda la hadlay ayaa uga mahadceliyay walaalaha deeqdan soo dhiibay, wuxuuna sheegay in lagu soo beegay xilli ay xaruntu baahi weyn u qabto.

"Xarunta agoonta iyo xanaanada carruurta ee Ahlu-Kheyr waxaa ku jira agoon tiradoodu gaarayso 340-cunug oo isugu jira 190-wiil iyo 150-gabdhood kuwaasoo aabayaashood ku waayay dagaallada socda" ayuu yiri Sheekh C/raxmaan.


Sidoo kale, wuxuu sheegay in dadka waalwaalan ee ay hayaan ay tiradoodu gaarayso 20-qof oo isugu jira 16-wiil iyo 4-gabdhood, isagoo xusay in 70-qof uu ALLE caafimaadkooda u soo celiyay oo ay xerada ka baxeen, halka 30-qof ay ku geeriyoodeen xerada dhexdeeda intii samafalkooda lagu jiray.

"Dhammaan shacabka Somalida ah ee ku nool dalka dibaddiisa iyo kuwa gudaha ku sugan ee ALLE uu hantida siiyay waxaan ka dalbanaynaa inay gargaaraan dadka walaalahooda ah ee dhibaateysan gaar ahaan dadka waalan iyo agoonta ah" ayuu yiri Sheekh C/ramaan Macow.
Guddoomiyaha xarunta Ahlu-Kheyr ee xannnaaneynta dadka waalan iyo daryeelka agoonta ayaa wuxuu ugu dambeyn u mahadceliyay dhamaan dadkii gargaarka u fidiyay xarunta, isagoo ALLE uga rajeeyay abaalmarin iyo guul adduunka ah.

wararka www.somalisan.com
musejisow@hotmail.com
E:mail admin@somalisan.com
Muuse Maxamuud Jiisow
00252-1-5576666
00252-50-907666