Dagaalo ayaa saaka mar kale dib uga qarxay qeybaha waqooyiga Muqdisho, iyadoo dagaaladan saaka ay yihiin kuwo waji cusub oo ay si toos uga qeyb galeen Ciidamada Amisom, kadib markii dagaalkii shalay ay galeen dib uga soo laabteen.

Dagaaladan ayaa mar kale dib uga bilowday aagagii shalay la isku fara saaray, waxaana uu ka dambeeyay, markii ciidamada dowladda isaga soo baxeen goobihii shalay Taangiyada Amisom u xoreeyeen.

Wararka qaar ayaa sheegaya in Ciidamada Amisom si rasmi ugu qalab qaateen dagaalka, waxaana la sheegayaa in ay damacsan yihiin in ay fariisimo rasmi ka sameysteen aagaga waqooyi.

Goobaha sida xoogan uga socdaan ayaa waxaa ka mid ah degmooyinka Shibis, C/casiis iyo Kaaraan oo ay marti geliyeen dagaaladii ka dhacayay bilihii la soo dhaafay oo u dhaxeeyay ciidamada dowladda iyo kooxaha mucaaradka.

Jugta culus ee madaafiicda qoryaha taangiga iyo BM-ka ayaa gees ka gees laga maqlayaa magaalada oo dhan, iyadoo dadka Muqdisho uu ku jiro dareen aad u kacsan, marka loo eego daruuraha colaadeed ee magaaladu ay dhex hoganeyso.

Ciidamada Amisom oo watay taangiyo oo ay wehliyeen baabuuro agab u sida iyo gawaarida loo yaqaano Katarbeelo ayaa la arkayay iyagoo sii galaya waqooyiga Muqdisho, waxaana tani micnaheeda tahay in ciidamada meelaha ay dagaan ay dhufeyso ka qodan rabaan amaba ay aasi rabaan wadooyinka ay dhulka u qodeen mucaaradka ee dhufeysyada ka dhigteen.

Dagaalka saaka dib u qarxay ayaa u muuqda inuu yahay diyaar garowgii dagaal ay waday dowladda, marka loo eego sida ay Ciidamada Amisom ugu qalab qaateen

Ciidamada Midoowka Afrika ee dagaalka haatan socda qeyb ka ah ayaa la sheegayaa in ay damacsan yihiin fariisimo cusub in ay ka dameeystaan woqooyiga magaalada Muqdisho ka dib markii shalay iyo saaka labo jeer Xarakada Mujaahidiinta Al Shabaab ay soo jabsadeen dhufeysyo ay ku jireen ciidamada Dowlada, waxaana la arkayaa ciidamada Amisom oo soo diyaarsaday siliga ay ku ootaan goobaha ay degaan taasi oo ka dhigi karta in ay fariisin ka sameeystaan woqooyiga magaalada Muqdisho.

Lama sadaalin karo natiijada dagaalka hasa ahatee waxa hubaal ah in dagaalkan haatan socdaa sababayo qasaaro badan oo kala gaara dhinacyada dagaalamay marka loo fiiro hubka aagaga dagaalka ka dhacaya.

Waxii soo kordha kala soco wararkeena danbe.

Muuse maxamuud Jiisow
musejisow@hotmail.com
Muqdisho Bakaaro Somalia
00252-1-5576666
00252-50-907666