Gudoonka Barlamanka KMG ee Soomaaliya ayaa sheegay in aanay waxba kala socon safarka Magaalada Garoowe ee Caasimada Puntland ay ku tageen ku dhawaad 10 xildhibaan oo ka tirsan Barlamanka KMG.

Gudoomiye ku xigeenka labaad ee Barlamanka kMG ee Soomaaliya Cusmaan Cilmi Boqore oo la hadlay warbaahinta ayaa uu ka hadlay ku dhawaad 10 xildhibaan oo ka tirsan Barlamanka KMG ee Soomaaliya oo ka soo jeeda Maamul goboleedka Puntland kuwaasi oo ku sugan Magaalada Garoowe ee Caasimada Maamul goboleedka Puntland.

Waxaa uu sheegay in gudoonka sare uusan waxba kala socon safarka ay xildhibaanadaasi ku tageen Maamul goboleedka Puntland kuwaasi oo uu sheegay in ay qeyb ka ahaayeen xildhibaano ku sugnaa mudooyinkii ugu dambeeyay wadanka Kenya,waxaana uu intaasi raaciyay in kulamo ay la qaateen Madaxda sare ee Maamul goboleedka Puntland kaasoo uu sheegay in uu Maqlay in looga hadlayay xalinta khilaafaadka ka dhex taagan maamulka Puntland iyo dowlada KMG.

Shalay galinkii dambe ayay aheeyd Markii xildhibaano ka tirsan Barlamanka kMG ee ku sugan Magaalada Garoowe ay kulan albaabadu u xirnaayeen la qaateen madaxweynaha Maamulkaasi iyo goliha wasiirada Puntland kaasoo looga hadlayay sidii loo wanaaji lahaa xiriirka ka dhaxeeya dowladda KMG iyo Maamulka Puntland.

Xubnaha ka tirsan Barlamanka Soomaaliya ee ku sugan Magaalada Garoowe ayaa ah xildhibaanadii ugu horeeyay ee ku jira barlamanka dowladda KMG oo gaara Maamul goboleedka Puntland tan iyo wixii ka dambeeyay khilaafkii soo kala dhexgalay Madaxweynaha Puntland C/raxmaan Faroole iyo Madaxweyne Sheekh Shariif Sheekh Axmed kadib kulan ka dhacay Nairobi.

Muuse maxamuud Jiisow
musejisow@hotmail.com
Muqdisho Bakaaro Somalia
00252-1-5576666
00252-50-907666